American kyaze vae (46) naw President tuh Joe Biden nynh a mue vaecite media hae nynh a ho hae . Joe Biden hynh President rynpaw Obamar lyaze Vice President lan 2009 te 2017 ryacia a tang bangpaw nynh a thua. 1988 kum kya Democratic lante President luakuh bua zah a sung bangpaw nynh thua.
Kamala Harris hynh zemah nopi kyaze masaty lante American Vice President (President a bungtu) lan a tang typaw lan yn tang vae cih.
Kamala Harris hynh Senate Hluettaw kyaze atu ryacia zemah pou a haeum cciamang paw lu kheit athua. Amaw hynh Indian te Ngeman a pykuhpaw nynh thua. Joe Biden nynh ngeman hae kyate mee muenaw elang cite ngeman lu kheit cite a popaw nynh thua. 
Atunin kum President pokunaw hynh aryn lya hawte thuakhyh. Atunin kum tuh ccaw kynaw kyate (စာတိုက်) mee pyanaw a rae hae keiccu nynh thua. President arianaw elang naw (1) phe aro koute nynh aria ung.
Atu President lan yn tang thawpaw Joe Biden hynh atu a hae cciamang paw President Trump nynh “nawccawnaw ka hoi khyh” cite a ho.
Mee luakunaw kyaze Media hae te Democratic hae nynh ccaving a pangkheih hae, tuh-e hae nynh oun taesah hae. tuhkeiccu nynh nawccawnaw mazi ka hoi khyh” cite a ho. “Byapianaw zungpi (Supreme Court) kyate kae hokuh cih” cite a ho.
President Trump nynh a kaethe hae paw hynh Byapianaw zungpi hae nynh nawccawnaw oun hoi hae ze atakaw te mee ria thuinaw bua oun hoi cih hae. Byapianaw zungpi kyate nawccawnaw a hoi khyh hae zetuh White House kyate hung pou lanpaw nynh um vae.
President Trump hynh ram ccan refugee hae hanlan te this is my right a cih hae paw hanlan te siainn mua hae hanlan tuh hooy maw rou khyh.
Thuasalama aening zyntu hae nynh tuh Kriccaaw thaw a pyatupaw lu kheit a thua keiccuze Kriccaw nungpaaw hae nynh thaw te a pangkhawnaw hae paw athua.
Honawlanze nopi te nopi, pise te pise umkheih khonaw te imua ccaaw chia khonaw kaw a pya khyh hae keiccuze President Trump te Repbulican hae hynh Kriccaaw nungpaaw hae nynh thawpyanaw paw athua. Democratic kya mee a pyabua hae paw Kriccaaw hae hynh, hynh-e uccaw cisahnaw kya “nawccawnaw ka hoibua” cinawpaw nynh thua.
Democratic hae tuh, e tahawpaw cisahnaw miakaw hynh marya kaw a pya hae paw thua. A ccaccing te ho lan zetuh Kriccaaw min hung bingkuh hae paw phuu. pawccecize “this my right” cipaw hynh ccaving a kynkuh hae. Hynh-e balyn hynh do lanze Pachia rynaw mazi thuakhyh cite muih lan um.
Pynsaw lante ho lan zetuh Democratic party tuh aening Chin minphuin ram ccan hae hanlan tuh myaryamaw ahooypaw maw nynh athua.
Muisaw lante a cceih hae paw phuu tuh Trump policy keiccuze mih zu kokuh khonaw a mue khyh hae zemah Pachia nynh khua bua yn khang ru cih cite Repbulican party thuapaw Trump hynh thaw houh a pya hae. Pawkeiccu cize zyntu hae nynh thawpya lan accanpaw tuh hynh-e party nynh thua cipaw ccaerarih lan a nykuh hae.
Media ccakyh kya hynh do lan ze Trump 214 kya pou nung hae zah Biden hynh 273, 279, 284, 290 ryacia a nung hae paw maw hynh, do lan ze ahme ccaccingpaw lansahkuh kho khyh hae cipaw phe lankuh. Tukeiccuze Trump nynh byapya zungpi kalan a kaethenaw hae paw athua.
Michigan state kya e mee a rianaw hae paw phe la ro sei keiccuze athaw lante bua ria thui hae zah Trump 56% te Biden 42% te phe a taenawpaw a muih hae. Pennsylvania state kyamah tuhcih mamin te bua a riathui ki hae cite thae lan um.
2000 kum nin kya George Bush 241 te AL Gore 271 a muepaw kya a sung bangpaw nynh thua. Thuasalama byapiatu hae nynh byapia thui hae zah 2000 kum kya Bush president lan bua a tang cipaw mang ah nyh cih oh cite ka tua. AL Gore mah President sisung lan sawpaw sah kheit a tang vaepaw nynh thua.
Aro mawze ahmepaw aphi yn lankuh cih.
