Laephi vawlang kyaze a hoirum huaccepaw Elon Musk nynh Twitter tuh $44B te thohpae lan are vae.
Inkhawnin ccaccung ninpalinin kya kuih singkuhnawpaw akua ccynkuhte Twitter company kalan a tee vae.
Company kalan he ate takaw mawte Twitter kyaze CEO athua hae paw Parag Agrawall te Vijaya Gadde te ccangpaw uktu a le hae paw tuh mih ryalaw kyate vaeleih a phua hae. A phuanaw hae paw tuh ahmepaw bya yn hopah khyh hae cite a de hae paw nynh thua. 
Anuhlang May saw kyakhe rekuh lan cite hokuh hae salazema Elon kalan te phe a seisah. A seisahnawpaw tuh Spam account (Seh te raepaw account) kya ahme leite a phei hae keiccu nynh thua.
Elon nynh Twitter hynh amaw a hoipaw lan a tang vae tetuh Tiwtter company nynh a khawpya hae paw Trump te ccaccangpaw account balyn bua yn hungpahthui vae cih hae cite a ho hae hawte Elon nynh mah Hynh-e hae hynh ka hungpya ry hae” cite a ho.
Trump nynh tuh “Elon nynh Twitter a repaw elang lung myarya ka tuakhae, Twitter tuh ccungccaw hooylei hae paw kuih kyate ccungccaw hooy hae paw kuih kalan phe thua vae, thuasalama Twitter ka mang ry loh khyh, kamaw ka hoipaw Trust Social mang ka hoibua vae” cite a ho.
Atu hawte Elon nynh Twitter a repaw hynh Democratic hae phu nynh mazi ry khyh hae. Re lan a ci lyaze mih thin myarya phangpaw nynh thua. Pawccecize Twitter te Facebook hynh Democrati thawpya hae paw thua zah minmin te ccianaw a lokuh lei hae paw account tuh marya leih a khawpyathya hae paw nynh thua.
“Elon nynh Twitter a re vae keiccuze mihrum hae takua Twitter kya phua atee khyh nawlan video kyawngia tee lei lan vae” cite a hyykuh hae paw phu mah patae a um ki.
Twitter hoitu lan yn tang thawpaw Elon nynh ‘Twitter ka repaw hynh phua muenaw elan abapi thua khyh, Laephi vawlang um hae paw ccungccaw miakaw tuh ahmepaw ccianaw te bya rythyh hokuh, thaekuh khyh nawlan cite ka tuapaw te nynh ka re” cite inkhawnin kya bua a ho.
Twitter a min zemah “Chief Twit” cite phe a rubi vae. Asuilang tuh “Pavaw phe lue vae” cinawpaw nynh thua.
#ZotungTubeTimes
