Paw Tin Za Ling tuh zekhanin Sep 28, 2022 nin Keko khua kya vae rhawkaw hae nynh phe a kyn hae.
Amaw hynh Malaysia lan thokuh bua lan cite Haekhaw kyate Yangon lan yn thokuhpaw Keko khua rhawkaw Gagte (ဂိတ်) a sisei hae paw te phe a kyn hae.
A kynnaw hae paw akonglang tuh a phone lungkhu kya-e tintang a kaenawpaw sakhung kha phe a muih hae keiccuze a kyn hae paw nynh thua.
Paw Tin Za Ling hynh CNA hae kya tintan a kae boi paw athuaapiaze Keko pepan kya zemah thawte rhaw pei a tuk buapaw nynh a thua.
Haekhaw kyate thokuh lan yn cilya mah ram ccang um hae paw, puipaw vaeccaw hae nynh “na phone kha beih yn phubia nan, namaw hanlan hooy khyh, ri lan myarya um” cite a hopya hae paw nynh thua.
Amaw nynh tuh “Ka phone lungkhu kya pawpaw sakhung mah um vae khyh, marya ka the (delete) kou vaepaw, pawtua um lan khyh” cite a lah hopya hae.
Thuasalama vethya ngawrei phe tung vae, Keko khua rhawkaw Gate kya he athua tuh a uccaw, a phone hae he a dotua (sisei) hae tuh sakhung pong ka vua vae a cipaw tuh computer te la do hae zah a vuapaw sakhung hae, tintang a kaenawpaw te rhaw a tuk lya e sakhung hae tuh pong la muih vae hae.
Tuin kyate thonginn lan tuh pou la cciakhae vae hae. Atakaw a kyn takawlya hae zw palih sakhan kya a nung lya hae tuh aepaw niapaw zemah a pya kho hae. Thuasalama atu tuh pawkya nynh a nung vae hae cipaw palih hae nynh mah “kae nyh vae khyh” la cipya vae hae.
Atunin Oct 2 nin kya hynh ခရိုင်မူး paw ry, sia boi paw ryte rhawkaw hae kalan lasung lante ccapyh phua pya lan hae zah pawkya nynh a nung hae cipaw zahbia te a lue kho nawlan ngiakuhtua lan hae cite a paccynkuh hae cite vaeccaw hae kyate thongpang thae lan um.
Alia vaepaw sawpaw 8-9 asaw vaepaw Tingsi ngawphue hae zemah atu hawte sakhung pong kae vua vae a ci hae paw tintang a kaenaw hae paw sakhung hae mih phone kya-e la muih hae zah phe kyn hae. Phua te zoikuh lan cite ccianua hae zemah phe a mya hae.
Tuh-e Tingsi ngawphua hae tuh kum (7) thongccaw lante a mint chiah hae zah atunin ryacia zoi kho khyh hae.
Ah Zotung minphuin kya Hynhtahawpaw uccaw hynh ah tung khyh nawlan oh puipaw vaeccaw, vaeccaw te hopyakuh te bebe thaekuh oh sih.
Atu e a kyn hae paw, Paw Tin Za Ling hynh a khua tuh Rangsae thua zah apaaw nynh phe a cciataw vaepaw nynh thua. Atu hynh a nung te a neitaw hae tuh India ram kya a umbua hae paw nynh thua.
Bawipaw nynh luenaw a pyanaw lan hae Sawsang te bawmbua oh sih.
#ZotungTubeTimes
