Zotung CDF hae nynh “ahooyte raeringkuhnaw kae pya zah bua kae saw” cite ccaw a tho hae paw nynh thua. Thuasalama e sahkhung muihkuh te mih ryalaw kya ngaethya lan myarya um.
Maj Cia Bik nynh “Zotung CDF hae nynh a buanaw hae ze a nahru balyn phe khya zah a chi anae te nynh zuin zah Haekhaw sizung lan nynh a cciakhae hae” cite online kya a zei.
Zotung CDF hae nynh tuh Hynhtahawpaw bya alung takyh “အထက်အမိန့် kalang te kaw oun pya hae paw” cite leih a ho he hae. 
“Atu e paw paawpi hynh do lan ze khua te ram hanlan myarya rya a lahpaw nynh thua” cite Ccungsung khohccaw hae nynh a ho hae.
Atakaw lyaze inn takyh te phua khoi hae zah aro mawze vae (2) naw phua bua khoi ki hae zah “kae vaw myarya a saw, anuh lang lya maw khaw nae khoi oh, Atu tuh phua kae hoi vae khyh zah kae khoi kho vae lan khyh” cite a khung hae keiccuze atu hawte dongan um lei lante a bua hae cite Maj Cia Bik nynh bua a ho.
Pawpawte lah thua zemah ahmaw minphuin pynkheih athuakuhpaw khua te ram hanlan zemah a ryalaw hawte tua te rya a lahpaw hynhhawte tuh bua lan ccang khyh.
Zotung CDF hae mah hynhte hooyleipaw cyisahnaw pei yn law lan hae zetuh mihmaw te mihmaw akhu pinkuhpaw nynh yn lo cih.
A khua tuh Ccungsung thua zah a min tuh Paaw Ngan Ngan nynh thua. CDF hae nynh a buanaw hae a vaemaw myarya cci keiccuze a dan khonaw lan myarya ru vae. Haekhaw te Yankong lan nynh cciakhae lan cite a paccynkuh hae cite a ho hae.
#ZotungTubeNews
