American Hluettaw zung pe mawtaw parking kya a ih hae paw rawkaw hae kalan President Biden nynh ngaethyanaw a bokuh hae.
Hynh-e rawkaw hae hynh Biden baebu byakinkunaw raenaw kya khynnaw khylan cite a nung pya hae paw nynh thua. Myarya akyanaw Mawtaw parking kya a ih hae paw sakhung tuh online kya oun pou te American luduh hae state uktubawi hae nynh thaw te Biden tuh a seisah hae.
Atakaw lya tuh Hluettaw lungkhu kya a ih sah hae paw nynh thua. President Joe Biden byakinkunaw a raekuh koute tuh hluettaw kyate de hae zah mawtaw parking kalang nynh a ih sah hae cite a ho hae.
President Biden byakinkunaw kya khynnaw hanlan cite rawkaw 25000 a nungpya hae paw nynh thua. Tuin koute tuh hluettaw lungkhu kya umsah vae lei hae te pou a de hae cite President Joe Biden tuh zaepi nynh ccih te ccih lan a voiphan hae. President Joe Biden a zu Jill Biden tuh rawkaw hae kalan cceih zah lasung pyate rawkaw hae kalan a paebua.
Ccungccaw abang nynh a honaw hae tetuh “Nancy Pelosi te democratic lupi hae nynh a desah hae paw nynh thua cih” cite a tua hae. Tuh-e thongpang yn thang koute President Joe Biden nynh rawkawbawi lupipaw kalan phone te ko zah a bohkuh hae cite a ho hae.
Te, Senate Democratic lupipaw Chuck Schumer nynh zemah “atu tahawpaw hynh nyalan bua a cyikuhsei khyhnaw lan byakin kae pya oh” cite a ho.
E konglang te Texas, Florida te New Hampshire uktubawi hae tuh mih thin myarya ria zah mih rawkaw hae tuh mih khua lang ccapyn a ko vae hae.
“Hynhzeih rawkaw hae hynh aromaw pong oun kisah vae cih hae zah rawkaw 7000 pepan tuh DC kya pou a ung um cih hae” cite Washington Post kya a zei hae.
#ZTC
Ref; BBC & WP
CRD_Sir Min Myat San
