Inkhawnin Nov 23, 2020 nin kya President Trump nynh accozah rya kya ryalaw rulaekunaw kya kaw hoitu hae General Services Administration (GSA) hae kalan kaw a pya vae hae.
Hynh-e GSA hae hynh accozah ryalaw kya miakaw ryahae a netu hae paw nynh thua hae. White House kya balyn hynh minmin nynh hynhte nynh ryalaw lan cite accyh a soi hae paw nynh thua.
President Trump nynh GSA lupinung Emily Murphy kalan thaesah zah GSA lupinung Emily Murphy nynh zemah Joe Biden kalan “Rya na law thyanaw elang na paccynkuh kho vae” cite ccaw a ky vae.
GSA hae nynh mah a hung nynh a tae cipaw hynh Nov 7, nin kya tyty leih hobua hae paw nynh thua. Thuaslama GSA hae nynh a hung nynh a tae cipaw ho khonaw kaw hoi khyh hae. Atunin kum tuh Nov 24 nin kyate nynh ryalaw rulaekunaw khylan cite Biden kalan a thaesah hae. 
Thuasalama “President luakunaw kya Joe Biden nynh a tae” cite phe ria lan ho loh khyh hae. Biden nynh zemah atu lya hynh accozah kya ryahaetu lan hae hynh palah khang kho nawlan thaw te a zuakuh cciamang.
Atunin ryacia kaw hoitu hae nynh ho loh khyh hae. Media kyate nynh Biden nynh a tae cite nynh hung ah ny um oh. President Trump zemah atunin ryacia “ka shung vae” cite nawccawnaw hoi kho loh khyh. Zekhanin lonawnin kya mawkhe “kamaw nynh ka tae” cite pou a ho umpaw nynh thua.
State kya-e hae byapitu a thua hae paw Pensylviania state te Gerogia state kya-e hae nynh President Trump te aphuu hae nynh tazae a ccoi hae paw balayn marya a seisah pya hae.
State e byapitu hae nynh atu hawte a seisah hae paw hynh President Trump tuh a lung houh tuapaw nynh thua. Pawccecize state e byapitu hae nynh a seisah kou hae te nynh Byapia zung pipi( supreme court) kalan a kae kho cihpaw nynh thua. President Trump nynh a rypaw tuhmah tuh-e laanpi nynh thua.
Atu hawte Trump nynh GSA hae kalan a thaesah hae paw hynh zemah ka shung vae cinawpaw thua khyh. GSA hae kalan a thaesah kou hae te zemah President Trump nynh “hynh-e president luakunaw konglang te GSA hae nynh bya pae khonaw kaw hoi khyh hae, kamaw mah ka thin mazi phang khyh” cite a Facebook kya a ho umpaw nynh thua.
Repbulican 79% te Democratic 47% hae nynh tuh President Trump nynh a tae cih cite ccaving a zyn hae. Malan pawte nynh yn thua cih cipaw ny kho um loh khyh. Thuasalama Democratic hae nynh tuh ngaehoinaw nynh a ngaw vae hae.
#ZotungTubeChannel
