American mahameih hae te Biden tuh khua te ram hanlan phone te a hokuh hae.
American President luakunaw kyaze Biden nynh a tae vae cite a kyawngianaw hae laku kya Trump nynh Tazae a ccoi cciamang lya ramccang e uktu bawi hae te a hokuh hae paw nynh thua.
Janpan wincichoh paw Yoshihide Suga te minih 15 kya Taluh nynh akaethung paw konglang te North Korea e nuclear konglang a hokuh hae.
South Korea uktu bawi Moon Jae-in te North Korea te nulan malan akaekuh thung vae leinaw kyate malan houh ccia thya nawlan hokuh hae zah President Trump byakinnaw a pya hae paw a paccyn ryngpaw kya ranouh lawchih lanpaw zemah nawccawnaw a hoi hae.
Australian wincichoh paw, Scott Morrison te ram kheit te ram kheit ccuepekuh thyanaw lan te pynkheihlan ryalaw kheih thyanaw konglang zemah bua a hokuh hae.
Ramccang e uktu bawi hae te lungtuabya hokuh hae salazema Rusia uktu bawi Vladimir Putin, Taluh uktu bawi Xi Jinping te Brazil uktu bawi Jair Bolsonaro hae tetuh atunin ryacia lungtuabya ccapyh mah ho khyh hae.
CNN News hae nynh “pawcce Taluh te Rusia kyate lungtuabya na ho khyh oh” cite news kyate a khia kou hae te Taluh accozah kyaze a ryahae myarya a le buapaw lu kheit nynh tuh “Ahme te President luakunaw kyatuh lungtua lan a ung cih” cite nynh hung a khung ru hae.
