Anuhlang lonaw President pokunaw kyaze ahme te rya a law leinaw hae a um cite a ny hae keiccuze inkhawnin ccaccung ninkheitnin kya Sineichoh William Bill Barr nynh state takyh kya-e sinei hae kalan raeringkunaw a pya hae.
William Barr nynh atu hawte kaw a pya keiccuze mee pyanaw kyaze ryalaw a kynpaw Richard Pilger tuh inkhawnin kyamaw “ka ryalaw kyate ka pou vae cih” cite rya a hae kheih hae paw kalan email te ccaw a ky vae hae.
Senate hluttaw Ted Cruz nynh hynhte a ho, “mee kyaze President Trump nynh pou yn lunghua vae tetuh um hing, um hing a hung nynh yn tae cih cipaw nykuh loh khyh, cite media hae nynh hokuh hae zah mee riapaw khaw a dahang sah hae. Tuin kyate yn lankuh vaepaw tuh Biden nynh pou yn tae vae” cite a ho. Hynhte bua a ho, “ny lanpaw tuh Media hae nynh President pya kho khyh hae”a ci. “Philadelphia te Detroit kya kyaze mee a rianaw kyamah ccungccaw hae nynh muih nan hae sah cite pang balyn ph ethungkhawkuh hae” cite bua a ho.
Senate hluttaw Lindsey Graham nynh mah hynhte bua a ho, “Pennsylvania state kya a chih vae haepaw Michi hae nynh vote pyabua hae paw konglang balyn ccaekia phe kae hoi vae” cite a ho.
Arizona te Georgia state kya mee bua a ria thui hae paw kyate Trump mee patae la lung hua vae. ccabung te kypaw mee hae nynh Biden tuh a taesah hae. Biden nynh a taenaw mee kya pung thum kyaze pung nin tuh ccabung kyate la thua hae paw nynh la thua. Nyathya lante a thua hae paw ccabung hae miakaw tuh ahme leite yn thua keiccuze riapyabua vae khyh hae.
Pawccecize ccabung kyate yn thuapaw mee hae tuh ID te ahooy te a ria kho vae khyh hae keiccu nynh thua. sethuhkuh leite yn thuapaw, sethuhkuh hae zah mih sethuh alokuh vae leipaw, a chih vae hae paw min te mee yn thuapaw balyn kha phe ny thui hae.
Media hae nynh Trump hynh atunin ryacia 214 kya nynh pou a nung hae.
Alaska state kya Trump nynh 2:1 te a taepaw balyn hynh atunin rya naw kheit a cih vae. Py pabia khyh hae.
North Carolina kyamah Trump nynh atunin cia pou tae zah Trump nynh a tae cipaw ria pahbia ki khyh hae. Trump nynh a tae lanpaw phe riapaw nynh thua.
Arizona kyamah Trump mee 30000 lae a zya huapaw kyate mee he bua ria thui hae zah Friday kya vaetuh 16985 makhae nynh azya hua vae. Atu lonaw lungkhu kya a ria kou hae te Trump nynh a tae lanpaw phe ria ki vae.
Georgia state kya mah Biden nynh 10353 te tae zah mee bua a ria thui hae koute Trump mee nynh bua a tae vae.
Pennsylvania state kya mah Nov (3) koute ccabung kyate yn thuapaw mee hae balyn hynh PC tazazung hae nynh ria khonaw kaw a pya hae keiccuze Biden nynh pou a tae vae.
Thuasalama Supreme Court hae nynh Nov (3) koute yn thuapaw mee hae takua kha accang te na nung cih oh” cite hopah hae zemah kaw ngae khyh hae zah vae (2) naw Supreme Court kya e Alito nynh bua a hopah hae.
Tuhzeih state kya-e mee hae balyn hynh Pennsylvania state kya-e mee 20 paw hobia leite Trump kya oun py pah kou hae tetuh Trump kya 269 yn mue vae cihpaw nynh athua.
Hynh-e State kya-e mee hae hynh December 08, 2020 nin ryacia athua cih zah December 14 nin kyatuh a hung nynh a tae cipaw ahme te phe ria lan oun ho vae cih hae.
