2020 Politicking (Naing-Ngan-Zei Mee Suenaw)
NLD accozah oun kae koute ah Vae ram, pyine state kyaze (Correction) laah-ae a lunghuanaw tuh Chin pyine cite Asian foundation, research tuanaw kyate a ho hae.
Chin minphuin tuh Khriccaw ah thua oh hawte Khri muinsang alolan ohpaw nynh thua. Proverbs 14:34, kyaze, “ Minphuin hangthungtu tuh dingnaw nynh thua. Seinaw tuh, pawpaw minphuin hanlan maethyanaw nynh thua”, a ci.
Kamaw lukheit te mee pya ka rypaw kosalepaw tuh, “Laah-aenaw ka dou cih, kamaw zemah pyarupaw ka lawkuh lang khyh,” cite mee suekupaw um zetuh pawpaw party thua zemah mee ka pya cih cite ka tuakuh. Atunin cia tuhte mee suekupaw um la khyh.
2008 Upadei ccauh a hoipaw te a riapaw nynh tuh na thaethya cih oh. Pawpaw party nynh a mue ze thuasah, Chin pyine Prime minister Vonkyi-Choh ryalaw heize a law zemah (Loh-Pain-Khuih) Autonomy hoi kho khyh. Baho, (Pyithungsuh) Loh-Pain-Khuih 99% a hoi keiccuze pawpaw mah cyi kho lang khyh.
Atu lya pyine accozah nynh ryalaw khopaw tuh Baho nynh state hanlan cite budget a pyapaw 4% kha myone hae kalang sah-ngae tyakuh zarkuh hawte piathungkupaw ryalaw nynh thua. (Kae ning myone tuh a ruu mawcci nae pya oh, asaw ccapisang oun pya bua oh cite pyine kya hokupaw ryalaw nynh thua.
Paaw hae nynh oun ho pyapaw hae; 1956 kum lyaze Ludu kosalepaw khuaccong lyaze accozah ryalatu (thaethyanaw lanze) siainn sayapaw lukheit tuh akonglang um leite a ryalawnaw kya a um khyh lanze Ludu kosalepaw nynh direct mawte tuh-e siainn sayapaw kha a ryalaw kyate a phua kho. A rypaw mah a khang kho. Loh-Pain-Khuih pataepi a hoi.
2008 Upadei ukkunaw te cciakhaekuh lyaze Federalism konglang hopaw tuh athua khopaw ka losah khyh. Va-e cize 2008 Upadei lungkhu Federalist cipaw um khyh. 2008 Upadei tuh pawtemou alokuh cize ka dih lya tang 5-8 cia siainn kae kae lyaze ball-pen cipaw kae mang la khyh.
Fountain-pen nynh kae mang ung. Tuh-e Fountain –pen tuh a cui um khyh zetuh mangkuh thya khyh. Ccacui bawm (A cui ) dyabiakuh te ccaw zeipaw nynh thua. 2008 Upadei lungkhu Federal tuh ccacui bawm um leipaw Fountain-pen te nynh alokuh. Fountain-pen tuh um salama a cui um khyh zetuh ccaw zei kho thua khyh.
2020 Election hynh 2008 Upadei thyhte raepaw te tuapaw athua keiccuze pawpaw party athua zemah Zotung hae hanlan Zotungpaw / Zotung nung a mue lanpaw kha myarya abapi. Pyiccu hluadaw kya thuasah, Amyocca hluadaw kya thuasah, Pyine No(2) hluadaw thuasah Zotung hae lu ning te a hluakupaw a um kho.
Zotung hae nynh ahmaw ccungccaw hluadaw kya a ha-ung bua kho nawlan uno-vaeccaw kha abapi lang tua leite ryalaw oun lawpah kho lanpaw kha mee pya oh sih. Mee pya nin tuh aru- aphih lante pyapaw thua zah hum ccungccaw nynh mah ae ny lang khyh oh.
Pawpawte thua zemah Zotungpaw te Zotung nung ahmaw ccungccaw kha mee pya oh sih. Ah khua ram hanlan khuakhannaw oun hoi kho hua cih.
Credit – Wisdom Post
