Democratic lante President luakuhnaw kya nyathya a laepaw Joe Biden nynh “American ram kya imua hae siainn kya Islam ccaw ccangkuhbia aho cite inkhawnin PBS News byakhialeihnaw kya ahopaw nynh thua.
Islam minphuin cisahnaw balyn hynh American ram kya houh akaethung nawlan zemah paccynkuh a ho cite bua a ho. Palestinians te Israel hae ram pei luakuh hae paw balyn hynh mihmaw raveih ram lante ka nungpya cih hae cite bua a ho ki.
“President lan poh kae tang kho ze Muslim hanlan cite a khe hae paw balyn pong ka hung ki cih” cite a ho. President Trump nynh accyh te a khawpya hae paw, Iran, Libya, Somalia, Syria, Yemen, North Korea te Venezuela, hae a thua hae paw Islam zemah rythyhte American lan yn tee kho nawlan hae mu ka tho cih’ a ci.
“Muslim hae nynh a sianaw hae roi balyn tuh President lan soleih kae tang te ahooy te Muslim hae hanlan rya ka lah ci” a ci. 
te, Democratic Party thua hae paw, Minnesota kyate Ilhan Omar, Indiana state kyate Andre Carson te Minnesota Attorney General Keith Ellison hae nynh Biden nynh a hopaw kya nawccawnaw a hoi hae. Hynh-e hae hynh Muslim hae nynh a thua hae.
Biden nynh Islam hae hanlan a hopaw hynh, November saw President luakuhnaw kya me muenaw khylan te a hopaw nynh thua cite ccungccaw hae nynh a weiphan hae. American ram kya hynh Muslim hae million pepan ung hae paw thua zah tuh-e hae kyate me mue lan cite a pacynkuhpaw nynh thua cite a ho hae.
“Aening nynh masaty lante sadu a thawkuh hua lan oh paw tuh, President Trump hynh President kyate de khonaw lanpaw hynh zuakuh lanpaw nynh athua” cite a ho. President Trump nynh a cipaw miakaw hynh marya ro lan cite a pacckynkuhpaw nynh thua.
Ny lanpaw ccangkheit tuh Biden nynh President lan yn tang zetuh American ram houh ro lanpaw nynh ung vae. President lan maw tang loh khyh, Kriccaw ram thuapaw American hynh Muslim hae kalan up lan cite a tuakuh vae. Thinpang lan myarya maw ung. Democratic paw, Obama President lan a tang lya mah White House kya Muslim hae patae kote sawsangnaw a mang khae hae paw nynh thua.
Kae tuh a hiinpaw Pachia ka beikpaw ka thua keiccuze President Trump maw nynh me bua ka pya ki cih.
Ref; The Western Journal
#ZotungTubeChannel
