Syria rang Damascus khua kya a ung hae paw Iran rawkaw sakhang tuh inkhawnin July 20 nin khuazi san kya Israel rawkaw hae nynh dungci te a kaw hae.
Golan mua hynh Israel nynh a hoipaw mua thua zah tuh-e Golan mua kyate nynh Syria Damascus kya a ung hae paw Iran rawkaw sakhang tuh a kaw hae. Syria accozah nynh tuh, Israel nynh yn kawpaw dungci hae tuh pong ccah lan phe kae khaw kho hae cite a kyawngia.
Thuasalama Israel accozah nynh tuh Iran sakhang ccangkheit tuh phe kae kaw cite a ho ki. Iran hynh Syria te myarya ccawkuh hae paw thua zah Iran sakhang tuh Syria rawkaw hae nynh a tuhkhaw hae.
Israel te Iran hynh myarya a rawkuh hae paw rang hae thua zah kum takyh ci hawte pou a kawkuh hae paw nynh thua hae. Iran, Syrial, Hibola hae nynh Israel hynh raw pipi lante a muih hae paw thua zah khuazi khuadae te pei a dokuhkhaw hae paw rang hae nynh thua hae.
Atu e Israel nynh a kawpaw Iran sakhang kya milu hohzeih nynh a chih hae cipaw nynh ho loh khyh hae. News kya Sana nynh a hopaw tuh “Syrial rawkaw lu (7) vaemaw mue hae zah leizing te rawtuh hae paw lu (2) hae tuh thawmawte vaemaw mue hae zah thinphang lan myarya a ung” cite a ho.
Atu a kawkuhnaw hae paw dungci hae mah sakhung kya na muih kho oh. Israel nynh a kawpaw sakhang min tuh Jabal al Mane pe kya ungpaw Iran sakhang nynh thua. Iran nynh mah kae ungtaw sae lan khyh zah kae kaw ru cih cite a ho ki vae.
Ref; The Jerusalem Post
#ZotungTubeChannel
