Atu e sakhung ah muih oh zah ah lungkaw kyate “WOW” cite soleih ah cih cih oh cite ka zyn.
Ah vaeram hynh phua myarya atee thyanaw ram ram kheit athua buapaw nynh thua. Thuasalama uktubawi rynpaw hae nynh khua te ram hanlan laeze mihmaw vue hanlan atuakuh hua hae keiccuze ah vaeram tuh atunin ryacia mazi kaethung kho khyh.
Hynh-e eenaw hynh khaw te a paccynkuh vae hae paw nynh thua. (2014) kum kya JICA (Japan International Cooperation Agency) hae nynh raethui lan cite dotua hae zah Mizatha te ccialeihkunaw (မန္မာ့မီးရထား၊ ပို႔ေဆာင္ေရးႏွင့္ ဆက္သြယ္ေရးဝန္ႀကီးဌာန) kya kaw hoitu hae ryte vae kheit a tungkuh boi vae hae paw thua. 
Accozah rynpaw hae nynh pawpawte sak lan, cyi lan cite paccynkuh hae salazema mih pacckuhnaw hawte thuasah kho boi khyh hae. Mih khu kalan rou nynh leih thuasah thya he hae.
Thuaslama (2015) kum kya NLD accozah yn kae koute vae tuh ah vaeram nin kheit koute nin kheit houhouh yn kaethungpaw ah muih vae oh. Innzoupaw bialae, laanpi, Hotell, Bus te Due citahawpaw balyn aryn lya e hae kha marya ro te ramccang e laanpi, Due phe lo lan hawte ccapyn a raethui vae hae.
Yangon Myo kya (25.7) Hehta akonaw amuin kya (2.51) Billion thang te sak lan cite a paccynkuh hae cite ny lan um. Atu e Yangon Mizattha buda hynh (2019-2020) kum te tho lan zah (2026 – 2027) kum kya phe lyn kho lante eenaw a hoi hae. 
Atunin kum 2020 accozah pokuhnaw kya hynh do lan ze ngaethya lan myarya um. Pawccecize arohpaw ah vaeram hynh thaw te oun raethui pah hae paw NLD accozah hynh thawte bua ah rawse he oh. Thaw houh pya lan accangpaw umpaw nynh thua.
Abang ccungccaw hae nynh kum (5) ryacia kae do vae, rya a law kho hae paw pawpawmah um khyh cite leih a ho thya he hae. Tuh-e kum (5) paw taraw nynh khua ram pynpi tuh vae kheith te pawtemou a law kho thya lanpaw tuh! Imua tuanaw nynh hung ah ho oh cite ka muih. Vaeram kaethungnaw elang hynh azyahua kum (10-20) yn ro um cihpaw nynh thua.
Alunghua ccungccaw hae nynh a rynaw hae tuh NLD accozah a kum phe yn tang te athuakhyhze acozah lan yn tang vae khyhze tuin kyate ahmaw minphuin paty (party) hynh siakhae te thawpya lan accang cite tua hae zah atunin kum 2020 kum kya tuh NLD accozah kalan pankhaw te mee a pya hae. Tuhte a pya hae liate nynh atunin kum kya NLD accozah nynh zoibaheih te phe tae khopaw thua.
Atu te malan kum zemah ah vaeram houh yn kaethung vae cih cite ngaehoi lan myarya um vae. NLD accozah lupi hae tuh Pya ruh (လဘ်ပေး လဘ်ယူ) cipaw hynh varyn a khe hae paw nynh thua. Pya ruh a lawkuh hae paw Winci hae mah phakheih detahnaw a pya hae paw mah ah thae vae cih oh.
