Malaysia ram kya a chih nung Mai Sui Hlei Tial a rua tuh Thantlang khua kalan teesah khae lei haete khohte (khuaking) lan kya laephi thaepyate a u sah hae.
Malaysia ram kya inn ahangpaw khang (9) ccakuanaw te ccah zah a chihpaw Mai Sui Hlei Tial a rua tuh Malaysia accozah hae te Myanmar ccangzung hae ryte nawccawnaw hoi hae zah vae ram lan a puinaw khua kalan a kikhae hae paw Thantlang khua kya he thua hae tuh, kaw hoitu (အာဏာပိုင်) hae nynh khua lungkhu lan teekhae sah vae khyh hae.
Akonglang tuh “saw chi lan te a chihpaw tuh khua lungkhu lan teekhae phong thua vae khyh” cite a ci hae keiccuze kaw hoitu (အာဏာပိုင်)hae nynh a kangnaw hae paw athua. 
Khohte lan, laephi thaepyate a u sah hae keiccuze nung/paaw hae te vaeccaw hae tuh a rua vawlan kya toukuh te thawte a rah hae. Nang so, Na vaeccaw lah thua lan ze pawcihvema na thinlung a ccih cih!!! Vaeccaw hae a rah hae paw ka do zah ka mitphi ka fukuh kho khyh. 😢😢😢
A kum (21) cih vae paw Mai Sui Hlei Tial tuh Sep 29, 2020 nin kya chih zah Oct 03, 2020 nin kya a rua tuh vae ram Yangon air pork kya thuakhae hae zah tuin kyate Chin pine Thantlang khua kalan pou a cciakhae hae paw nynh thua.
Vaeccaw hae nynh “khua lungkhu lan teekhae lan azae khyhze sawku kalan sangkaw pou cciakhae te u sah khonaw beih oun pya kheih oh” cite thawte ngiakuh hae zemah phe a kan hae. Phua sui patae thangkuhte puinaw khua kya a thuakhae ccahleih vae hae paw ngaethya lan myarya um.
Tuhte a kan hae keiccuze rampibawi paw te kaw hoitu hae tuh ccungccaw miakaw nynh myarya a seisah hae. Ccungccaw lu kheit pipi ui chihpaw, mia chihpaw laephi kya hung u hawte a u hae paw elang thinria lan maw myarya um.
Update: Awkhualan tahawpaw kya Vaeccaw hae te Kriccaaw nung/paaw hae ryte kaw hoitu hae te tungkunaw bua hoi thui hae zah Inkhawnin suimihlang 12:00pm te tuh Mai Sui Hlei Tial a rua tuh bua lei hae zah khua lungkhu lan sawku kya a u sah vae hae.
#ZotungTubeChannel
