Tutan zarh i Minneapolis ah mirang police nih minak pa George Floyd thi lakin a hnawng ah a khuk in a rialdit hnu in US ram chung khuapi tampi ah duhlonak langhternak an hun tuah hna.
Law enforcement pawl nih miphun tlawm pawl an tuahto mi hna kong ah New York in Atlanta tiang in khuapi tampi ah thil le ri hrawh le khangh tiangin a chuak. Floyd a thattu pa police cu Derek Chauvin a si i, Friday ah khan lainawng hmuh in an tazaa an cuai.
Kum 46 a si cangmi Floyd a thah ruangah police Chauvin cu third-degree lainawn hmuh in tazaa an cuai. A hawi le pathum he an rian in an phuah cang hna.
Friday zaan ah khan Detroit ah mipa pakhat nih sport mawtaw a hun i mongh i duhlonak a langhtermi mibu lei ah meithal a hun puah i kum 19 tlangvalno cu meithal in thih lakin a hun kah i lophir in a zaam. Detroit Public Safety Headquarters lenglei zawn ah khin “Police pawl an Thatlonak kan Doh” timi tlaangtaar in minung a zaza in duhlonak an langhter.
Dinnak a um lo ah cun daihnak a um lo (No justice, no peace) tiin mpi cu an au. “Police pawl an thatlonak hi Donghter Cang u” timi le “Mikip an thaw an chuah khawh hlan chung cu ka aumi hi ka ngol bal lai lo” timi tlangtaar an i thlir lulh hna.
New York ah cun duhlonak langhter in a aukhuang mi pawl cu lam kip ah an khat i, police pawl nih cun thakbere hang le meikhu in an kah hna i, tor le cheng an tlaih hna. Manhattan ah cun “Kan thaw kan chuah kho lo” timi tlaang an tar i an au. Cun, 2014 lio i minak pa Eric Garner police pa thi lakin a hrom a dihmi kong zong kha “hrawmdih” tiin tlaang an hun taarpiak.
Washington ah cun police le Secret Service agents pawl cu an hriamnaam thazaang he White House velchum cu an ven. Lafayette Square lam cung ah cun “Ka thaw ka chuah kho ti lo” tiin mipi cu an hung au lulh hna.
“Ka zaangfah ko, ka thaw ka chuah kho ti lo hih” tiin thawchuah bancham in Floyd ai sualsan cuahmah lio minung pakhat nih a cell phone in a zeih mi cu internet ah a taar tikah cun US rampumpi a hninh bak in a hun hninh i, duhlonak langhternak rian an hun thok colh ve hi asi.
Minneapolis le khuapi tampi ah hin miphun thleidannak hi a um peng ko rih mi nih hin US criminal justice system (misualmi an sual bantuk tein tuanvo lakternak) hi a filvokter dih, tiah civil rights pawl nih an chim.
Atlanta I Buainak
Friday zaan ah khan duhlonak a langhtertu minung 1,000 lenglo cu Centennial Olympic Park in the state capitol lei tiang mawtaw traffic tiang an kham dih i an aukhuang hna. Martlin Luther King Jr., a fanu hniangbik Bernice King nih cun mipi pawl cu inn lei tin dingin a chimh hna.
Duhlonak an langhter lio ah a dang buaibainak an tuah chihmi a um tung. CNN Center pawng, Atlanta downtown ah inn le lo an khangh.
Mawtaw tampi an khanhmi lakah police mawtaw pakhat zong ai tel. CNN inn a thlalangawng zong an den, a hmailei dawr khaan zong an hrawh. Police pawl nih an hun nam hna nain, mipi nih thawl in an rak cheh hna.
Denver le Houston zongah lampi khat in duhlonak an langhter hna. Minneapolice ah cun, tianzaan i an khangh mi police state velchum ah zaan 8 ah police nih curfew tuah an timh caah kan i tong hna lai, tiin minung a zaza an i sawm hna.
“Hi ka kan rak chuah cio nak a ruang cu, kanmah chan tal ah cun thil sining pawl hi hun i thleng cang hna seh, ti kan duh caah a si,” tiah kum 25 a si mi duhlonak a langhter ve tu minakmi Paul Selman nih a chim.
Mipi nih police state an khangh hnu, cun Minneapolis ningcang tein a um than khawhnak hnga, tiin National Guard pawl an vung phaak nakin a zaan thum hnu lawngah a tu bantuk in Hennepin County nih lainawngpa tazaan an cuainak thawngpang than hi a si.
Lainawngpa Chauvin an tlaihmi thawngpang nih hin mipi an thinhunnak a damter theu lai, tiah nawlngeitu pawl nih ruahchannak nganpi an ngei. Asinain, Mayor Jacob Frey nih 8 pm ah curfew tuah dingin nawl a chuahmi ruangah duhlonak a langhtertu minung 500 lenglo le police karlak ah buaibainak faakpiin a tlung than.
Mipi nih an denmi Third Precinct inn cu police pawl nih an ven i, plastic kuanfang, tear gas le meikhu bomb in mipi cu an then hna.
A dang duhlonak a langhtertu phu pakhat nih Fifth Precinct state cu an den ve than i, police pawl nih tear gas le plastic kuangfang in heh tiah an hun kah hna i, mipi cu an then hna. A pawngkam bank pakhat le cakuatnak zung pakhat zong an khangh.
Asinain, Thursday zaan i mipi nakin cun Friday zaan i mipi cu an tlawm deuh ngai ko cang. Tluangtlam tein duhlonak a langhtertu mipi zong cu a khuapi kip ti ngacha in cun an rak um ve caah, police pawl zong cu a si khawh chungin an a neemnak deuh in cawlcangh an i zuam ve.
Lainawngpa Chauvin hi tlaih a si cang i, a kong thatein kan hlat cuahmah i, a tlawmbik kum 25 thong a tla kho mi a si. Cun a hawi le pathum a si mi Thomas Lane, Tou Thao le J Alexander Kueng zong cu tazaang cuai an si ve ko lai, tiah Hennepin Country attorney Mike Freeman nih a chim.
Floyd hi Houston mi a si i, nighclub ah security guard a tuanmi a si. Monday zanlei ah khan dawr ah phaisa check lehmah deu in cakuat cawk ai tim, tiin an tlaih hi a si.
Credit: Chelseabawi
Credit = Photos
#Reuters
