Vae ram kyaze sexy (Angki a kikuh khyhnaw kong) lante a min myarya thaannung Model Nang Mwe San tuh rhawkaw hae nynh kum (6) thongccaw thuasah cite amint atho hae.
Nang Mwe San hynh Siboi lu kheit athua apiaze Model lu kheit mah athua. “Ahooyleipaw cyisahnaw a rae, a sakung a video kyate phua muenaw a raeku, vae minphuin maethya oun law” cite tazaeccoi hae zah atunin byapae hae zah kum (6) thongccaw thuasah cite kaw a tho hae.
Atu hynh Nang Mwe San te Thinzar Wint Kyaw hynh “ahooyleipaw a rae hae” cite lu ning te a kyn hae paw nynh thua.
“Hynh-e lu ning hae laeze ccangpaw Model hae houh a so hae paw patae a um haenaw laku kyaze pawte ccangpaw hae so na kynbua khyh oh, kaening thaw oun pya leipaw cite ruasua te na kyn oh paw nynh thua” cite zemah zaepi hae kyate a voiphan he hae.
“Phua mih vawsaw vae zah phua a hoi cih cite a tua hae paw te phua a lawkuh ry hae paw te a kyn hae paw nynh thua’ cite zemah zaepi kalan te patae a voiphan hae.
Inkhaw kum Mar 11, 2021 nin kya vae rhawkaw hae nynh kawkhyanaw a lua takaw lya hae ze Nang Mwe San nynh mihraw bya te laephi pynpi nynh a ny hae ccaw cite a hopaw kha nynh abyapi lante a kyn cih hae cite a ho hae.
Nang Mwe San te Thinzar Wint Kyaw lu ning maw te tazae a ccoi hae paw konglang phe aloku. Thuasalama Nang Muw San hynh bya a pia hae paw phe arang hua. Hynh-e lu ning hae hynh Aug 5, 2022 nin kya a kyn hae paw nynh thua.
#ZotungTubeTimes
