Atunin July 02, 2020 nin suimihlan 10:00am lae pepan kya khua a rawbia keiccuze laephi pong ting zah ccungccaw milu azyahua (200) lae phe ting thing hae cite a ho hae.
Suimihlan 11:00am pepan kya tuh arua (60) a law kho hae. Ninthu Suimihlan 12:00pm lae kya tuh arua (110) a law kho vae hae. Tuhlae hae paw arua hae zemah a ccung cciamang ung hae.
“Khua mah pyhpyh pou arawbia ung keiccuze bua yn tin kho ung cite raeringkuhte nynh mih rua mah kae ccungde cite maee-khumtu hae nynh a ho hae.
Awkhua suimihlan 6:00am ccyh kyaze khorohtui te khivae pykuhte araw keiccuze a thaenaw hae paw laephipo hae tuh pong cia vae keiccuze atin nawpaw nynh thua. “Atu e laephi atinpaw tuh Japan ram e Tsunami te nynh aloku” cite Kachin pine Ccazantah wincipaw U Darshi lal Sain nynh a ho.
Anuhlang saw June 23 nin kyamah atu hawte laephi tin zah ccungccaw (2) chih vae hae paw nynh thua. Kachin ram Phakant khua lung a ccung hae paw hynh kum takyhte laephi nynh tin thing hae zah ccungccaw pei a chihpaw nynh thua.
“Lung a thae hae paw hynh group ccangkheit kyaze ccunccaw lu 5-6 ccite a thae hae paw thua zah abalynte group (30) lae a cihpaw nynh thua” cite Wincipaw nynh bua a ho.
A cciataw hae paw mih vaeccaw hae tuh, e sakhung hynh do cih hae zah pawcih vema mih thinlung ccih ci. Ngaethya khae lan hae kou ung. Sawsang te mah la bungbua sih oh.
#ZotungTubeChannel
Credit- Photos
