Ccangvae lu kheitpaw tuh liaccanung myarya a sungsah theih. “Myarya a sungsah” cipaw laeze “chi makhia athang kho leipaw sungsanaw te a sungsah” cize kou ccinghua cih.
A kum kum (7) cia ccangvaepaw nynh lung thang leite atunin ryacia a sungsah. 2012 te 2018 lan tee vae. Huataw paw sungsanaw thuakhyh. Myarya hangpaw te myarya khupaw sungsanaw thuazah thaethya kho ung leipaw sungsanaw nynh thua.
Amaw a pyn laeze liaccanung a sungsah hua. A thinlung phe khokuh lan ryacia te a sungsah. Liaccanung hanlan tuh amaw kya a ung khyh zemah lasung patae a pya. Liaccanung nynh zemah ngaethya ung sahpaw te a lasung tuh a law pyaku he. A sungsahnung hanlan tuh a hoi leipaw kya-e balyn phe pya kou he.
Nin kheit tuh kum (6) han he yn cihte ccangvaepaw hanlan khuaning phe yn ccah. Pawmah cize, liaccanung kalan te “Kamaw kalan te kae pya kho khyhpaw yn ngaethya, hohtuh hohtuh mah kae sungsah ru kho ngaw khyh” cihpaw bya phe a thae tuh ccangvaepaw tuh vya chih lan thawte sia zah a rah. a nin, nin (2) ryacia fufuccae lante thaw mawte a rah he.
Pawcihmah tuhte thinlung cci te vae kheit te khang kho lei lan ciate a raw cize ccangvaepaw nynh a pyapaw lasung taraw hae tuh liaccanung nynh marya a lawkuh he keiccuze “Yn sungsah ru, a maethya paw te nynh kae sungsah ru” cite yn ci ngan khyhpaw nynh thuacih cite a la tuakuh keiccu nynh thua.
Liaccanung nynh mah “nae sungsah keiccuze ka lung myarya tua, nang nynh ka thinlung phe nae rulae vae” cite ccaw a la ky bang.
Tuhte kum (2) lae cihte Ccangvaepaw tuh ka lungdae nawlang cite zisa lu (2), lu (3) a nungkuh tua. Pawpawte zisa nungkuh salazema a liaccanung tuh nin kheit sangmah ning kho khyh.
Tukeiccuze ccangvaepaw nynh a liaccanung tuh hynhte a hopya, Nang laelan tuh a hung mah ka sungsah kho vae khyh, a hung mah ka ry vae khyh, namaw rou nynh zungzae kae sungsah cih. Zu ka lah hoi zemah nang tuh zungzae ka thinlung kya zungzae kae la nungku cih” cite a hopya.
Ccaw riatu hae so nae thinlung pawcce vema cih ci??.. Tuh-e ccangvaepaw hanlan, malang elang tuapya lan ze ngaethyakhae lan myarya um zah thawcci lan ungkhyh tou?
Hynhcih ccihpaw sungsahkunaw laephi vaw lan ung nan sah, ung nan sah..