President Trump nynh American ram kya byapianaw kyaze ahang huaccenaw byapia zungpi kya, rya a hae lan cite a popaw byapiatu Amy Coney Barrett tuh inkhawnin Oct 26, 2020 nin Parlimen (Hluettaw) kya mee pya te po hae zah alunghua nawccawnaw te Amy Coney tuh a po vae hae.
Amy hynh aryn lya zemah State kya byapiatu lu kheit a thua. Malan vae tuh byapianaw zung ale huaccenaw kya rya a haebua vae cih. Byapiatu Amy tuh a chi makhia, athuakhyhze amaw nynh a pou ry makhia tuh ahang huanaw byapia zungpi kya rya a hae vae cih. Amy hynh Indiana State kya um nung nynh athua.
President a luakuh buapaw Joe Biden te Democratic hae nynh “atute President a taepaw nynh pokuh thua sah” cite thaw te a khenaw hae laku kyaze President Trump nynh “ka ryahae athua keiccuze ka law lanpaw nynh athua” cih zah Amy tuh yn pode zah yn teekhae paw nynh thua.
American ram kya ahang huaccenaw zungpi kya hynh byapiatu hae lu (9) um hae zah tuh-e lu (9) hae laku kyaze lu (6) hae tuh conservative (Republican party) hae thua hae zah, lu (3) hae tuh Liberal (Democratic party) hae nynh a thua hae.
Democratic hae nynh thawte a khenaw hae paw tuh malan ccyh kyaze byapiatu hae lu (9) kya mee pyanaw kyaze American ram kya conservative hae nynh pou oun tae cih hae zah a cciakhae lan hae paw kha mih thin myarya a phang keiccuze a khenaw hae paw nynh thua. Atu tuh pawpawte athua zemah Liberal hae tuh pataepi thaw phe a zyahua vae hae.
President Trump nynh Amy hynh lu (3) naw byapiatu lan yn popaw nynh thua. Kum (4) lungkhu kyaze President Trump nynh lu (3) po khonaw ccyhooy phe a mue. 2017 kum kyaze byapiatu Neil Gorsuch, 2018 kum kyaze byapiatu Brett Kavanaugh te atu 2020 kum kya Amy Coney Barrett hae hynh a po hae paw nynh thua.
#ZotungTubeChannel
