Yn thua cihpaw malan saw November nin (3) kya tuh American President me (vote) pyanaw ccyh yn thua vae cih. Amaw a rypaw President me pya kho athua. A ry leipaw President tuh a hung nynh mah pyasahde kho thua khyh. Thualama ram ccang hae thua hae paw China, Iran te Rusia hae nynh na ry leipaw President na ny lei lante poh ae pyasahde kho hae.
American FBI hae te CIA hae nynh zemah hynh-e konglang mih thin myarya a phang. Taluh nynh Trump vae (2) naw President lan bua yn tang lanpaw hynh myarya a rihpaw nynh thua. President Trump hynh a cisahnaw hynh ny myarya ru zah mazi ry khyh hae. Iran zemah tuhcih ngaethae, Trump a ry hae paw te fuakuhnaw hanlan online te thaw te a zuakuh hae. Rusia zemah Biden hynh a ry leipaw thua zah Biden a sungnaw hanlanpaw hynh akaw te rya thaw te a law hae.
Online social media kya do lan ze President Trump laeze Joe Biden hynh ccungccaw hae nynh a rynaw hae paw Poll dae alunghua he. Thuasalama Joe Biden nynh yn tae cih cite ho kho thua khyh. Trump a ry hae paw ccungccaw hae hynh Trump haw mawte mih luboh ccakae hae mawcci nynh la thua hae. Pawccecize online social media kya thaw te me (vote) pya khyh hae. Me pyanaw ccaacing kya hynh nynh, ccapyn leih a pya he hae.
President Trump nynh rya a lawpaw hynh mah ccungccaw nynh mazi khantman (ခမ္႔မွန္း) kho thua khyh. Tukeiccu nynh naingainzei ccama hae nynh mah Trump nynh a cisahnaw hynh kyn kho khyh hae zah phe pae lan bya ho kho khyh hae.
Atunin kum zemah President Trump nynh bua yn mue kho cite a ho hae. Nang so?
#ZotungTubeChannel
