Taluh nynh raepaw TikTok hynh American ram khua ram hanlan ri lan myarya um cite a ci keiccuze American accozah nynh khua ram khynaw hanlan TikTok tuh kae mang vae lan khyh, kae khaw vae cih cite anulang lonaw kyakhe American hluttaw hae te President Trump accozah hae nynh khaw lan vae cite a ho vae hae paw nynh thua.
Thuasalazema Microsoft company nynh TikTok tuh re lan cite a paccnykuh cite thongpang salae yn thang koute atu vae tuh Microsoft lupi thuapaw, Satya Nadella nynh Trump te tungkunaw a hoi hae. Taluh kyate phe pae lan Microsoft nynh re lan te kae ci, tukeiccuze hynh-e konglang te atu lya pei kae hokuh um cite Trump kya a ho.
Microsoft company nynh re lan a ci keiccuze American khynnaw hanlan tuh thinphang lanpaw mazi um vae khyh. Tukeiccuze President Trump nynh (45) nin ryacia accyh kae pya oh, tuin lungkhu kya phe ria lan na rekuh cih oh cite a hopya. 
Hynh-e TikTok a hoitupaw ccaccing company tuh ByteDance company nynh thua. Taluh ram kyate a rae hae paw athua keiccuze Taluh accozahte a bungkuh mamin cih hae cite thinphangnaw te khua ram khynnaw hanlan tuate khaw lan cite a paccynkuh hae paw nynh thua. Taluh nynh raepaw TikTok hynh video dyn taraw te zuenaw hanlan myarya hooypaw thua zah laephi pynpi ram balyn kya pong a mang vae hae paw thua zah American lungkhu kya mang leite um lanpaw tuh myarya seipaw ccangkheit athua keiccuze Microsoft te re lan cite a hokuh hae paw nynh thua.
Trump nynh atu hawte a lung rulaekuhpaw hynh American luduh hae hanlan tuapya thyanaw ccangkheit thua zah November saw kya President luakuhnaw kya amaw hanlan mah myarya a hoipaw nynh thua. Alia vaepaw ninning kyaze republican a bang hae nynh zemah Microsoft kalan TikTok zua lanpaw kya nawccaw lanpaw konglang Trump kha thaw a pya hae paw nynh thua.
Atu hawte Trump te Microsoft nynh TikTok konglang te a hokuh hae paw hynh American luduh hae hanlan te amaw hanlan mah myarya a hoipaw nynh thua cite Republican paw, Lindsey Graham nynh zemah a lungtua nawpaw a ho.
American ram kya TikTok khaw lan vae cite a thae hae paw TikTok a zue thya hae paw hanlan tuh lungtuanaw nin cihawte nynh hung thua vae.
#ZotungTubeChannel
