Atu lya American te Taluh tuh nin kheit koute nin kheit kawkunaw houhouh anae vae keiccuze ram ning mawte nulang malang sikuh lan zae kho vae khyh cite a ho vae hae. Taluh nynh mah rili konglang te houh adae nawlang houh te houh kae zuakuh cih cite ccavving a ci vae.
American nynh tuhte a ho koute Taluh nynh mah Taluh ram king e rili te asekuh lante kae dae lan khyh, houh kae dahang cih” cite a ho vae keiccuze nulang malang sikuhnaw kou ru vae zah aro mawze oun kawkuh lan hae paw nynh hung um vae. American B52 te B1B hae tuh Taluh ram rili kya valyn valyn khiasahkuh cciamang vae hae.
American te mahameih ram hae nynh ready te ccaving a um kou vae hae. India nynh mah Taluh ramri king kya rawkaw patae asaw vae. Japan mah tuhcih ngaethae a rawkaw hae ready te ccapyn a umsah vae hae. ccaccang hae paw rem taraw hae, Thailand, Singapore, Hongkong, Taiwan te South Korea hae zemah paccynkuh te nynh a um vae hae.
Atu hynh American accozah Taluh ram kalan asaw hae paw hynh patae acih vae. Vawzouinn phupaw Sanphalung sah (2), Crozier Sanpahlung sah (2), Sanphalung aroh khopaw sanphalung sah (5), Arang te thuipaw Sanphalung taraw sah (5), Nuclear aphupaw tuikaw cceihpaw Sanphalung sah (2), uccaw thahpaw sanphalung sah (1) thua zah, abalynte sah (17) a umpaw kyate atu hynh (30) han American nynh Taluh ram king lan pong asaw kou vae.
Sanphalung sah kheit nynh athangpaw phua hynh dollar million te athangpaw thua zah abalyn te hohzeihmou athang vae cih? phe beih lan athang vaepaw nynh thua. Hynhzeih phua hynh American nynh alawkaw hung thangsah huataw lan khyh zah soleih oun kaw lan hae paw phe ria vae.
American hluettaw nynh mah Taluh tazaeccoi khonaw lanpaw upadi thawpaw ninpalinin July 30, 2020 nin kya phe rae kho vae hae. “Taluh nynh hynh-e virus te laephi pynpi balyn te pong oun ling kou cipaw phe ria ccaccing” cite Senate hluettaw paw, Graham nynh mah a ho. Taluh nynh laephi pynpi balyn hynpya te ccungccaw patae a chiapaw hanlan a rung cih, Taluh accozah nynh Taluh ram lungkhu kya tuh vawzouinn zousah vae leite a khaw zemah ram ccang hae kalan tuh ccinaw pong kae hae sah cite ram ccang kalan a poupaw vawzouinn tuh pou a ua hae keiccuze Virus tuh laephi pynpi kya ccapyn apazaekuh” cite bua a ho.
Tuhkeiccuze atu lya hynh laephi pynpi nynh mah Taluh accozah maw nynh, hynh-e virus hynh a saw raroupaw cite pong a zyn vae hae. Atakaw lya mah virus konglang te leihla lan cite ram ccang hae nynh zuakuh hae zemah Taluh accoza nynh mih ram kalan mazi teesah khyh hae paw balyn hynh atu tuh ram pynpi balyn nynh zyn vae khyh hae. 
American te mahameih hae nynh ccaving a voilukhaw hae paw thua zah, a kawkuh lan hae paw tuh 80% phe ria vae. Taluh accozah nynh American te mahameih hae kya phua te tou oun rung cih hae, kae sei vae cite tou oun ngiakuh cih hae, athuakhyhze, raw tou oun tuhde cih hae? tuh-e kya ccangkhakheit tuh pokuh lanpaw nynh hung um vae.
Ccangkheit tua lanpaw tuh “pawcce American nynh palah a kaw khyh cizetuh, American nynh tuh,Taluh a vaw phe yn saw, a vue phe yn law ryacia hynh do te phan a dory umpaw nynh thua. Tuh-e ccyh kya ze Nuclear na vua ci, na lua hae paw ram te rili tou na pya cih hae, Covid-19 Virus hanlan rung te laephi pynpi hae tou ngaethyakunaw na ngiakuh cih hae citahawpaw miakaw tuh American nynh a ho thyh hawte hung ci lanpaw nynh thua vae.
Tuh-e miakaw tuh Taluh nynh a zui kho khyh zetuh Taluh ram tuh maethe tarih tuh khuaraw te raw lanpaw nynh thua vae. American accozah makhae thua vae leite American hluettaw hae nynh mah Takuh hynh a kaw ry vae hae paw nynh thua. Iran hynh Taluh kalan beihbeih a panbua rypaw thua zah American nynh Israel zya hopah zah Iran kynnaw khylan cite Iran sakhang tuh a kawsah. Iran yn dahang bua ze Israel te zoukhaekuh lante a hokuh hae. American luboh myarya ru. Cceih ru vae!!!!!
#ZotungTubeChannel
