American ram kya hynh accozah nynh chidetahnaw a pya khyhnaw hae hynh kum (17) cih vaepaw thua zah anuhlang saw kyate chidetahnaw accozah nynh kaw a pya ki vae hae.
Inkhawnin ccaccung ninkheitnin kya ze Daniel Lewis Lee tuh chidetahnaw pya lan cite a cidyn hae suimihlang ccangkheit lungkhu kya byapiatu (တရားသူၾကီး) lu kheitpaw nynh chianaw kaw phe khe. Daniel Lewis Lee hynh January 31, 1973 kum kya puipaw thua zah atu hynh kum (47) cih vae. Yukon, Oklahoma State kya ungpaw nynh thua. Ccanung lu kheit a hoi vae paw nynh thua.
American accozah nynh chidetahnaw a pya hae paw, Daniel Lewis Lee, Wesley Ira Purkey ၊ Sudtin Lee Honken te Keith Dwayne Nelson hae tuh Federal byapiatupaw Tanya S. Chutkan nynh phe a khe ung. Tanya S. Chutkan nynh chidetahnaw a khepaw tuh President Trump baho accozah nynh chidetahnaw bua a pya lan hae paw a zuakuh hae cite a ho hae.
Byapiatupaw nynh a khe koute baho byaiaptu hae alunghua lu (5) hae nynh chia thuasah cite byapaenaw a hoi kou hae te Oklahoma Yukon kya ngerawpaw Daniel Lewis Lee tuh Indiana Federal accozah thonginn kya eisi kawte chidetahnaw a pya hae. Daniel Lewis Lee hynh kum (8) nung imua taraw te a innbyn hae balynte ccapyn a chia hae keiccuze chidetahnaw a muepaw nynh thua.1996 kum kya innbyn inn kheit kya luthum mawte a chia hae paw thua zah 1999 kum kyate thung a ccah vae hae paw nynh thua. 
Nopi taraw hae kynde hae zah a ihkhae hae koute phe chiabia hae paw lu (2) hae te atu epaw Daniel Lewis Lee hae hynh atu saw July saw te August saw lungkhu kya chidetahnaw pya lan cite amint a tho hae paw nynh thua. Federal byapiazung kyate ccungccaw milu (62) hae tuh chidetahnaw a pya lan hae paw a ung hae cite a ho hae.
June saw kya Attorney General William Barr nynh chidetahnaw kae pya hae paw cite atu e misei luthum hae hynh a hopaw nynh thua. Tuhlae hae paw lu (2) hae zemah aro mawze yn theih vae cih hae.
#ZotungTubeChannel
.
