Atu lya American ram kya sandah a pianaw hae kyaze ccungccaw muinsan (ရုပ္တျ) a ro hae paw miakaw tuh marya kae kyn cih hae cite President Trump nynh amint a tho vae.
Nungpaaw thuihei leinaw ram hawte ka thuasah ry khyh, Tuh-e ccungccaw hae raw kyate muinsan hae khynsah khylan kawbya (upadi) ka tho cite bua a ho.
Langmaw kaw lyate muinsan a rae hae paw pakheih tuh sandah a pia hae paw nynh marya a ro hae keiccuze Trump nynh “Hynh-e uccaw tuh zaepi nynh hoipaw uccaw thua zah zaepi uccaw a ro hae paw miakaw azyahua thong kum (10) saw thua cih cite zekhanin Friday kya amint a tho vae.
Te, Satate kya-e lupi hae te palih bawi hae nynh, hynh-e ccungccaw hae raw kyate na thungkhaw kho khyh oh keiccuze pya lanpaw phua mah myarya kae phiah cih hae cite amint kya a thobia.
Muinsan a nung ry khyh hae ze ahooyte kaw hoitu hae kalan ngiakuh kho athua. Thuasalama atu hawte kia leipaw ccaaw hae ozia hawte muinsan ropaw tuh ka ry khyh cite bua a ho.
Bawipaw Jesu Kri muinsan balyn ngeraw muinsan nynh kyn cite ro lante a paccynkuh hae. Atu-e munsan a ro hae paw miakaw hynh myarya alepaw amuh te detah thua cih hae cite ccaw a thonaw kyaze a thobia.
Te, Inn hae te sain hae kalan tee te uccaw a ru hae paw miakaw balyn atu hynh CCTV te do hae zah accozah nynh aruh lante pakheih a kyn vae hae paw nynh thua.
#ZotungTubeChannel
