Ngeraw palih hae nynh ngemanpaw lu kheit zekhanin ninpangawnin (June 12, 2020) khe Atlanta Georgia khua kya bua chia ki vae hae. A chihpaw min tuh Rayshard Brooks kum (27) paw nynh thua.
A chianaw hae paw asuilang tuh Wendy sain kya rekuhnaw laanpi kya a mawtaw te phang khawkuh zah la ihpaw nynh thua. Te nynh, Sain kya-e rya lahtu hae nynh palih hae kalan phone te a konua hae.
Te, palihpaw Garrett Rolfe nynh a mawtaw tuh khuabiate thawte a tho depaw hynh mah a pyn kya a tahkuhpaw camera te muih kho athua. Palihpaw a pyn kya atakuhpaw camera kyate dothui hae zah lu (2) mawte ahooyte bya balyn minutes (30) hang a beikuh hae paw nynh thua. Palihpaw lu kheit Devin Brosnan he yn thuate samaw nia vae ze tounawpaw te he tou tua hae tuh, a niapaw phe la lungpaw nynh la thua.
Palih hae nynh kyn hae zah laephi kya a dyde cciamang lya hae ze palihpaw kya-e ccungccaw ningsahkuhnawpaw maethe (Taser) tuh poh lua zah a ccue lalia lante palihpaw tuh kaw lan cite a ee keiccu nynh palihpaw nynh maethe ccung (3) a kaw nawpaw nynh athua. A kawtu palihpaw tuh mah, suimihlan (24) lungkhu kya a ryahae phe phua hae.
Sandah a piabuapaw ngemanpaw, Marquavian Odom nynh “George Floyd a chia hae keiccuze sandah pia thua zah phe yn lae vae cih, vosi ka cih zah bua lae khyh, ngeman hae pei yn chia mamin hae, ka ngae phe thah” cite CNN news kya a ho.
Atu a chihpaw Rayshard Brooks hynh zu hoi vaepaw thua zah imua lu (3) sah vae hae paw nynh thua. Imua hae mah mih kum myarya a no ung hae paw kum (8) te a kawlang e hae nynh thua hae cite CNN News kya a zei hae.
Rayshard Brooks tuh palih hae nynh bua a chia hae keiccuze sandah bua pia hae zah Wendy sain zemah maee te phe rua hae.Tuin kyaze ccungccaw (36) phe kyn hae. Wendy sain masaty maee te a rua typaw zemah kyn lan cite atu hynh a sisei cciamang ung hae.
Credit – CNN
Credit – Photos
#ZotungTubeChannel
