Inkhawnin ccaccung ninningnin (Aug 04, 2020 ) kya Beirut myo kya uccaw a nungnaw hae paw inn tuh phe paw sei zah ccungccaw (100) lae chih hae zah ccungccaw (4000) lae vaemaw a mue hae. “Hynhlae lan mah a chihpaw bua yn um kho um” cite ကျန်းမာရေးဝန်ကြီ Hamad Hasan nynh a ho.
Atu e apawpaw hynh pawkeiccu nynh apaw cipaw ahooy te nyh loh khyh hae zah a sisei cciamang um hae. Hynh-e uccaw a nungnaw hae paw inn hynh hohtuhmah yn paw cite pei a honaw hae te atunin cia kum (10) lae a cih vae. Ccungccaw hae nynh a tua hae hawte inkhawnin tuh ri lan myarya um lante phe paw ccaccing vae. 
Hynh-e apawpaw konglang te a sekuh hae paw ccungccaw hae hynh detahnaw kae pya cih hae cite Lebanon wincipaw Hassan Diab nynh a ci. Atu e apawpaw athaw hynh innryh asuekuhpaw 3.3 cih athawsae cite a ho hae. A chih hae paw kyaze imua hae zemah patae chihbua hae zah ngaethya lan myarya maw um..
“Khuazi lan tuh bungnaw rya kae lah kho khyh, phe ru, pawccecize maee balyn pong a chi keiccuze vawsaw myarya um” cite zemah ကျန်းမာရေးဝန်ကြီ Hamad Hasan nynh bua a ho. “Maee rya lahtu hae mah lu (10) phe vae hae” cite khua bawipaw nynh a ci.
Te, Vaemaw a mue hae paw eih lung keiccuze sizung nynh zemah ccung khyh hae cite a ho hae. 
Atu-e apawpaw tuh ccungccaw nynh kawpaw bung apawpaw te lokuh khyh, bung apawpaw tuh maeekhuh aman, thuasalama atu-e apawpaw tuh man te man leite asepaw te amepaw azung hawte nynh a ci” cite a muih hae paw nynh a ho hae. Apawnaw te ame, me (10) pepan ryacia tuh, inn hae balyn pakheih pong a roh kou. Mawtaw hae zemah phe dawleihkuh kou hae. Me (10) pepan kya a um hae paw balyn tuh akoi nawpaw, athyh hae nynh pia he hae zah, mih chi mih nae te ccungccaw patae a tung hae. 
Australian accozah nynh “Hynh-e vawsawnaw kya kae ccungccaw lu kheit zemah phe chihbua” cite a ho. American nynh “Lebanon khoccaw hae ryte ngaethyanaw kae hoibua zah bung lanpaw zemah ccaving kae paccynkuh” cite a ho hae. Tuhlae hae paw ram hae nynh zemah a bungbua rynaw hae paw a lansahkuh hae.
Atunin Ccaccung ninthumnin kya tuh Lebenon wincipaw nynh “khua ram ngaethyanaw nin” cite anin a khya. Video na muihpaw tuh pawcih nynh ri lan um cipaw phe na nyh cih oh. Pawkeiccu nynh apaw cipaw zemah aromaw Lebanon uktu hae nynh bua oun ho cih hae.
Credit – photos
#ZotungTubeChannel
