Atu lya Taluh (China) te American hynh vyavya kawkuhnaw ccyh thua vae. Ram kheit te ram kheit mah accozah te sekuhpaw zung hae balyn a khawpyakuh he vae hae.
Hynhte hung ho lanze, Taluh mah Nuclear hoi zah nuclear te hung kaw ngawrei cite bua ho lan a um. Nuclear tuh mang hoi sou. Nuclear te kae kaw cih cite hung kaw lan azae leipaw.Tuh-e Nuclear bung te kawnaw lanpaw tuh pawtemou a kaw cih hae? Dungpian alu kya tah te kaw lan tuh mang zae sou, Thuasalama American ram phe thua lan dungpian Taluh hoi kho loh khyh. 
Dungpian Poh la hoi zemah American nynh laanryn te phah kaw khaw cih. Vawzouinn (Leizin) te a zou zemah American ram king lan American nynh thuamaw a thuasah cih zaw tou! Taluh vawzouinn laeze American vawzouinn asinh patae ahanghua. American ram te Taluh ram kalan phe bua athua lan, vawzouinn Taluh hoi kho loh khyh.
Vawzouinn phupaw Sanphalung (Ccingbaw) te a cceih ngawrei cite bua ho lan azae. Rili kyate zemah American ram king lan Taluh rawkaw hae a thua kho lan hae paw thua khyh. Laanryn kyamaw American nynh phe vaesah vae cih hae. Tuikaw cceihpaw Sanphalung te bua ccia hae zemah Taluh kya-e Tuikaw cceihpaw Sanphalung tuh aroi myarya ccae zah sisung mawte phe nyh cih hae. Rili kya miakaw hynh Amerian Tuikaw kya cceihpaw Sanphalung pawcihte nynh santarih a ccung hae cipaw hung nynh ny khho thua khyh, ria te ria cihpaw nynh thua. Kaw kheit maw kawsah mang lan khyh hae. Tuikaw lungkhu kya sawku lan hung tang lanpaw vae.
Ny lanpaw ccangkheit tuh American ram king kya ccangpaw ram hae kya Taluh rawkaw sakhang ccangkheit sangmah um khyh. American ram pepan kya Taluh te phe ccawkuh hae paw ram mazi ung khyh. Canada te mah ccawkuh khyh hae. Tuakuh ty leite Nuclear hung saw hae zemah mihmaw hung chi lanpaw nynh hung thua. 
Taluh nynh American ram kya, phe thuasah khonaw lanpaw pawpaw ung khyh salama American nynh tuh zoi baheih te a tuh khopaw nynh thua. American nynh atu hynh Sanphalung ccang (2) te ccaving a nungdae vae. Tuh-e Sanphalung ccangkheit kyaze rawtuh nawlan myarya hooypaw, ame myarya rupaw F-35 Vawzouinn sungtarya (80) hang aphupaw ynh thua.
Hynh-e Vawzouinn F-35 hynh Zeida nynh akyn kho leipaw phin nynh thua. Sanphalung lungkhu kya hynh American rawkaw milu (5000) pepan cia a um hae paw nynh thua. Darzin hohzehmou cih vae cih tuatua ccavae. Vawzouinn phupaw Sanphalung te ccaccangpaw Sanphalung taraw hae nynh santarih ccaving bua a ccungkhaw hae paw thua zah F-35 Vawzouinn mah ccaccangpaw vawzouinn hae nynh raw ccaving bua a viakhaw hae paw nynh thua. 
Tuhkoute, Taluh ram pepan kya American rawkaw sakhang nua te nua. American te mahameih a thua hae paw, Japan, India, Thailand, Singapore, Hongkong, Taiwan te South Korea citahawpaw ram hae kya American rawkaw phe beih hae. Taluh ram voi te pong voi khaw hae paw nynh thua. 
American ram e rawkaw hae nynh pawpawmah cibua leite Taluh ram pepan kya a ung hae paw maw nynh piasah lan khyh hae. Chi makhia mah Taluh nynh American tuh a tae kho naw lanpaw asuilang mazi um khyh.
Credit photos..
#ZotungTubeChannel
