George Floyd a ngin kya a ccu te a sydetupaw Derek Chauvin tuh inkhawnin Monday kya masaty lante tazaezung kya bya a pia vae hae.
Minneapolis kya Byapiatupaw Jeannice Reding nynh amakhan USA $1000000 (တစ္သန္း) te a pya. Tuh-e a pyanaw kyaze accyh khyapya athua. Tuh-e a khyapya hae paw tuh Maethe nae up cih, state ccang lan na cceih lan khyh zah George Floyd te a innbyn hae te vaeccawkunaw na rae lan khyh citahawpaw amakhan te a saw.
Atu saw June 29 nin kya vae (2) naw tazaezung bua a chin hae. A seinaw a ung, ung khyh cite a ho vae lei hae paw linmaw angki zung kisahkuh hae zah byapiatu nynh bya a khia lya balayn pawpaw raw mah rinaw thinlung hoi leite bya a phipya.
Atu lya hynh USA pynpi kya sandah Thawte a pia hae apiaze ram ccang lan mah ngeraw-ngeman laesahkunaw ung nan sah cite sandah Thawte a piabua. George Floyd nynh a chipaw tuh covid-19 ccinaw la hoi keiccu nynh a hy la sue kho khyhpaw athua cih cite Sibawi hae nynh a ho hae.
Hynh-e George Floyd hynh atakaw lya mah thonginn avaelu pataw a ccah bangpaw vae nynh la thua. Avaelu 4-5 thong a ccawnaw kyaze sawpaw (10) pepan ryacia pei la ccah vae paw nynh thua. Atu he a chihte a rua zemah bawi hae te kaw hoitu hae nynh zemah a rua puisahnaw kya patae thuabua hae zah sawtuapyanaw zemah accyh sisung a raepya hae.
Tua lanpaw ccangkheit tuh ccungccaw hooy leipaw avaelu thonginn kalan a thua vae paw lu kheit atu hawte sawtuapyanaw a raepya hae paw hynh ngaeang thua lan myarya ung. abang ccungccaw nynh tuh Ngeman hae mih lung hooy nawlan nynh hung a raepya hae cite a hopaw mah ung zah mihruh damiapaw atu hawte sawtuapyanaw na rae oh paw tuh khuaruaru lan myarya ung cite a voiphan ki hae.
Thongpang ccangkheit kyaze George Floyd a innbyn hae nynh ” UN hae kalan cciate laephi vawlan kya balyn a ung hae paw palih (Police) hae miakaw ung nan vae sah cite kae ngiakuh cih” a ci hae cite a ho hae. Amepaw tah me leipaw tah ci tuh ny lan ung khyh. Thuasalama a thua kho leipaw ryalaw nynh athua.
#ZotungTubeChannel
