Taluh ram king kya ungpaw rili konglang bya lung hae paw kalan american nynh ka pangkhaw cih hae cite a ho vae.
Atu lya hynh Taluh ram akawlang e (Rili) te join pakheih hae tuh “kaemaw nynh kae sepaw, kae ram lungkhu e” cite Taluh hae nynh a kyawngia hae keiccuze, tuh-e rili te a naekuh hae paw ccaccangpaw ram taraw haete thawte a eikuh he hae.
Tuh-e rili pepan kya tuh Taluh nynh atu lya rawkaw patae mah nung zah rawtuhkunaw hanlan thawte a paccynkuh hae. Ccaccangpaw ram hae a thua hae paw, India, Singapore, Philippine, Malaysia, Brunei, Thainwaie te Vietnam ram hae nynh zemah “kae rili, kae jion’ cite bua a kyawngia bua hae.
Taluh nynh 90% tuh kae kya-e nynh thua” cite a ho koute hynh-e ram hae nynh zemah “kaening zemah kae hoibua, kae kya-e nynh thua” cite a ho hae. Hynh-e konglang te kum takyh bya lung hae paw thua zah inkhawnin te vae tuh American nynh tazawin te ram dih hae paw kalan yn pangkhawnaw hae paw nynh thua.
Inkhawnin kya ze Mike Pompeo nynh “ram taraw hae kalan American nynh kae pangkhaw cih hae, pawccecize hynh-e rili hae te jion hae hynh Taluh nynh marya a pepaw thua khyh, kae rili a ci hae paw hynh athua leipaw nynh a ho hae” cite ram taraw hae kalan dahang te a pangkhaw hae.
Hynhte bua a ho, “Ram taraw hae kalan bungnaw thuasah ccaccangpaw lante zemah thuasah marya kae bung cih hae” cite Mike Pompeo nynh inkhawnin ccaccaung ninthumnin kya a ho.
E konglang te Taluh te American tuh bya pei a lung hae. Zekhanin kya American nynh rawtuhnawpaw leizin patae aphupaw ccingbaw sah ning Taluh ram rili king lan a saw vae. American nynh hynhte a cipaw elang Taluh tuh a bung myarya paw.
Atu lya American te Taluh tuh nin kheit koute nin kheit koukoua rawkuh vae hae. Hynhtuhmah ‘pung pung pung” yn ccae.
#ZotungTubeChannel
