Inkhawnin June 29, 2020 nin kya American ram Louisiana state kya ccaaw chiakuh kho khyhnaw kaw a kan haenaw kyate inkhawnin tetuh ccaaw chia khonaw kaw phe pya vae hae.
“Atu hawte imua ccaaw chia khonaw kaw a pya hae keiccuze Ameican ccaaw theih ry hae paw hanlan tuh taenaw ccangkheit nynh athua” cite ccaaw chia khonaw lante a zuakuh hae paw hae nynh lungtuanaw bya a ho hae.
Byapiatu hae lu (9) kyaze lu (5) hae nynh ry hae zah phe tae hae. A rypaw te a ry leipaw me (4) te phe khangkuh hae zah byapiatu kyaze a le huaccepaw John Roberts nynh a rypaw kalan me a pyabua keiccuze ccaaw chia khonaw kaw tuh bya phe pae kho hae.
Byapiatu zung kyate atu hawte bya a pae hae paw elang White House lupi hae nynh seisah hae zah mih naw ccaw khae khyh hae. 
Ccaaw chiapaw cipaw hynh aening Kriccaaw hae hiinzia tetuh mazi akaihkuh leipaw nynh thua. Pawccecize Pachia nynh a ry leipaw seinaw pipi nynh thua.
Pachia nyh lei hae paw nynh tuh “amaw a pyn tuh amaw kaw khya zah ccaaw zemah chiakuh kho athua, a paaw ung leipaw imua tuh kae lawkuh ry khyh” cite a ho he hae. Te, Pise hae nynh ihkhae de te hoipaw “ccaaw” tuh kae lawkuh ry khyh keiccuze ccaaw tuh chiakuh khue mue lan accan” cite leih a ho he hae.
Tuh-e tuh Pachia nynh mazi a ry leipaw hiinzia nynh thua. Ccaaw lu kheit chiapaw hynh ccungccaw piccan lu kheit chiapaw te lokuh zah ccungccaw muisaw lu kheit chiapaw lan nynh phe tang vae. Cccungccaw theihtu lan nynh tang vae.
Byapiatu hae nynh atu hawte bya a pae hae paw tuh ngaethya lan myarya ung.
#ZotungTubeChannel
Credit photos
